//  గోదావరి //

త్రయంబకేశ్వరుడునా'సిక' విడువంగ 

ఝుమ్మని కదిలె గోదావరి 

కందకుర్తినందు తెలుగింట ప్రవేశింపంగ

శ్రీరామ్ సాగరంను నింపె గోదావరి

బాసర వాగ్దేవిని అర్చింపంగ

ఆదిలాబాద్ లో అడుగిడె గోదావరి 

నల్లబంగారపు నేలను తాకంగ

కరీంనగర్ లో కాలిడె గోదావరి

జలగనులతో 'గోదావరిఖని'గ మార్చంగ

తిమిరాలను తరిమె గోదావరి 

ఏటూరునాగారాన ఏరులై పారంగ 

ఓరుగల్లును ఓలలాడించె గోదావరి

కిన్నెరసానిని తనలో కలుపుకొనంగ 

భద్రాద్రి రాముని భక్తితో కొలిచె గోదావరి      

పట్టిసీమకి అందాలు అద్దంగ 

పశ్చిమాన ప్రవేశించె గోదావరి 

పాపికొండలకు సోయగాలు చూపంగ 

తూరుపు వాకిట నిలిచె గోదావరి

రాజమండ్రికి రాజసం కలిగింపంగ

'అఖండము'గా మారె గోదావరి

అన్నదాతకి అభయమీయంగ

దక్షిణగంగగా దర్శనమిచ్చె గోదావరి

అంతర్వేది నృసింహునికి మొక్కంగ

సాగరంలో సంగమించె గోదావరి