// సోయగాల చైత్రం //
కుహూకుహూల గానామృతంతో
పికం ఆహ్వానిస్తుంది తొలి తెలుగు మాసాన్ని
విరించి రచించిన నొసటి రాతలతో
అఖిల జగత్తు పురుడు పోసుకున్న లావణ్యాన్ని!
మౌనవ్రత ఉద్యాపన గావించిన కోయిలమ్మ పిలుస్తుంది
కళావిహీనమైన ప్రకృతికి సొగసులద్దుతూ
వాసంత సమీరాలనందించే మధుమాసపు సౌందర్యాన్ని,
కొత్త శకానికి నాందిగా యుగారంభంతో
కష్ట ,సుఖాలను విడమరిచే సందేశాల సారాన్ని!
పరితము కిలకిలరాగపు వాయిద్యాలతో
స్వాగతిస్తుంది రామయ్య పరిణయ వేడుక జరిపే కాలాన్ని
సోయగాల పుడమి చుట్టూ పరిభ్రమించే గ్రహాల లెక్కతో
మంచి , చెడులను ముందుంచే ద్విపక్షాన్ని
సకల ప్రజల ఆశా నయనాల వీక్షణాలతో
కోయిలమ్మ రారమ్మంటుంది అందాల చైత్రాన్ని!
No comments:
Post a Comment